Published_ 17 November 2023

တရုတ်-မြန်မာဆက်ဆံရေးတွင် နစကအနေဖြင့် ကောင်းမွန်လျက်ရှိကြောင်း နစက သတင်း ထုတ်ပြန်ရေးအဖွဲ့ခေါင်းဆောင်၊ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက ပြောသည်။

ပြီးခဲ့သည့် အောက်တိုဘာလ ၂၇ ရက်ကစပြီး ချင်းရွှေဟော်မြို့ အပါအဝင် ရှမ်းပြည်နယ် မြောက်ပိုင်းအတွင်း ကိုးကန့် ၊ တအာင်း နှင့် ရက္ခိုင် တို့ပါဝင်သော ညီနောင်မဟာမိတ် တိုင်းရင်းသားလက်နက်ကိုင် ၃ ဖွဲ့က တပြိုင် တည်း ထိုးစစ်ဆင် တိုက်ခိုက်မှု၏ နောက်ကွယ်တွင် တရုတ်နိုင်ငံအနေဖြင့် ပါဝင်ပတ် သက်မှုရှိနေကြောင်း လူမှုကွန်ရက် သတင်းများတွင် ရေးသားနေကြသည့်အပေါ် ယင်းက အထက်ပါအတိုင်း ပြောကြားခြင်းလည်း ဖြစ်သည်။

“လက်ရှိတရုတ်-မြန်မာဆက်ဆံရေးအခြေအနေကောင်းမွန်လျက်ရှိပါတယ်။မြောက်ပိုင်း ကိစ္စကတရုတ်နိုင်ငံမှာ အွန်လိုင်းလိမ် လည်မှု ကျားဖျန့်ကိစ္စ ၊ ဒါပြည်သူလူထုက Pressure များနေတဲ့ကိစ္စဖြစ်တဲ့အတွက်ကြောင့်မို့ ဒါကိုအချိန် ကိုက်အသုံးချသွားတာဖြစ်တယ်။

တရုတ်-မြန်မာနယ်စပ်မှာကျားဖျန့်ကိစ္စနဲ့ပတ်သက်ပြီး လုပ်ကိုင်ခဲ့ တာက အဓိကအဖွဲ့အစည်း ၃ ဖွဲ့ရှိပါတယ်။"ဝ"နယ်မြေ၊"မိုင်းလား"နယ်မြေ၊"ကိုးကန့်"နယ်မြေအတူတူပါပဲ။သို့သော်အကုန်လုံး အပြစ်မှန်သမျှကိုဒီအစိုးရရဲ့ထိန်းချုပ်မှုအောက်မှာရှိတဲ့ကိုးကန့်နယ်မြေကိုလွဲချချင်တဲ့သဘော ပဲ ၊ ပြီးခဲ့တဲ့ ရက်တွေက ကျွန်တော်ပြောခဲ့သလိုပဲ အတိတ်သမိုင်းအကြောင်းတွေအရ ကိုးကန့်က ဖုန်ကျားရှင် ဆိုတာယခင်ကကျွန်တော်တို့ ဗကပ ၁၉၆၈ ခုနှစ်လောက်က ဗကပ တပ် မဟာ ၄၀၄ ခေါင်းဆောင်ဖြစ် ခဲ့ တယ်။ ဒါကြောင့်မို့ဆက် စပ်မှုတွေကတော့ရှိနေတာ ဖြစ်တယ်။အားပေးအားမြှောက်တဲ့သူတွေလည်းရှိကောင်းရှိနိုင်တယ်။သို့သော် တရုတ်-မြန်မာဆက်ဆံရေးကတော့ကျွန်တော်တို့အနေနဲ့ကောင်းမွန်လျက်ရှိပါ တယ်”ဟု ယင်းက ပြောသည်။

မြန်မာနိုင်ငံ ဘက်အသီး သီးက အခြေခံဥပဒေနှင့် တရားဥပဒေမူဘောင်အောက်တွင် သဘောထားကွဲလွဲ မှုများ ကိုဖြေရှင်း၍ တွေ့ဆုံ ဆွေးနွေးမှုဖြင့် ပြန်လည် သင့်မြတ်ရေးဖော်ဆောင်ရန် အားပေးကြောင်း မြန်မာနိုင်ငံ သို့ နိုဝင်ဘာလ ၃ ရက်မှ ၅ ရက်ထိ လာရောက်ခဲ့သည့် တရုတ်နိုင်ငံ လက်ထောက်နိုင်ငံ ခြား ရေးဝန်ကြီး Mr. Nong Rong က ပြောကြားခဲ့သည်။

ယင်းအပြင် မြန်မာနိုင်ငံက တရုတ်နိုင်ငံနှင့်အတူ နယ်စပ်တည်ငြိမ်အေးချမ်းမှုကို ကာကွယ်ထိန်းသိမ်း၍ တရုတ် ဘက် နယ်စပ်ပြည်သူများ တစ်ကိုယ်ရေနှင့်စည်း စိမ်ဥစ္စာဘေးကင်းလုံခြုံမှုကို အာမခံပေးစေလိုကြောင်း နှင့် တရုတ်နိုင်ငံနိုင်ငံအနေဖြင့် မြန်မာ နိုင်ငံနှင့်ပူးပေါင်း၍ အွန်လိုင်းလောင်းကစားနှင့် ဆက်သွယ်ရေးလိမ်လည်မှု စသည့်နယ်စပ်ဖြတ်ကျော် ပြစ်မှုကျူးလွန်မှုများကို ဆက်လက်တိုက်ဖျက်သွားလိုကြောင်း ပြောကြားခဲ့သေး သည်။

ရှမ်းပြည်နယ်၊ ကိုးကန့်ကိုယ်ပိုင်အုပ်ချုပ်ခွင့်ရဒေသအတွင်း Online လိမ်လည်မှု များ၊ လူကို သွေးဆောင်ဖျား ယောင်းမှုများ၊ လူပြန်ပေးမှုများ၊ တရားမဝင်ချုပ်နှောင် မှုများ၊ ခြောက်လှန့်တောင်းယူမှု များကို ဂိုဏ်းဖွဲ့ကျူး လွန်ခြင်း၊ ကျူးလွန်ရန်အားထုတ် ခြင်း၊ အားပေးကူညီခြင်းများကို ကျူးလွန် နေသော Ming Xuechang (မြီ‌ရှောက်ချန်း)၊ Ming Guoping(မြီကော်ဖျင်း)(ခ)Ming Xiaoping (မြီရှောက်ဖျင်း)၊ Ming Julan (မြီကျွီလန်) နှင့် Ming Zhenzhen(မြီကျိန်းကျိန်း)တို့ ၄ ဦးကို ဥပဒေအရ အရေးယူရန် နိုဝင်ဘာလ ၁၅ ရက်တွင် ကိုးကန့် ကိုယ်ပိုင်အုပ်ချုပ်ခွင့်ရဒေသ တရားရုံးက ဖမ်းဝရမ်းထုတ်ဆင့်ထားခဲ့ရာ ယင်းအထဲမှ Ming Xuechang (မြီ‌ရှောက်ချန်း)၊ Ming Guoping (မြီကော်ဖျင်း)(ခ)Ming Xiaoping (မြီရှောက်ဖျင်း)နှင့် Ming Zhenzhen (မြီကျိန်းကျိန်း)တို့ ၃ ကို ကိုးကန့်ကိုယ်ပိုင်အုပ်ချုပ်ခွင့်ရဒေသ၊ လောက်ကိုင် မြို့၌ နိုဝင်ဘာလ ၁၆ ရက်က ဖမ်းဆီးမိခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

၎င်းတို့အား ဖမ်းဆီးစဉ် Ming Xuechang(မြီ‌ရှောက်ချန်း)ကတရားမဝင်ကိုင် ဆောင်ထားသည့် ပစ္စတိုသေ နတ်ဖြင့် မိမိကိုယ်ကို ပစ်ခတ်ခဲ့သဖြင့် ထိခိုက်ဒဏ်ရာရရှိခဲ့ပြီး ဆေးကုသမှုခံယူစဉ် သေဆုံးသွားခဲ့ကြောင်း ၊အထက်ပါ ဖမ်းဆီးရမိသူများအား တရားဥပဒေအရအရေးယူနိုင်ရေး အတွက် မြန်မာ-တရုတ်နယ်စပ်ရှိ ရန်လုံကျိုင်း နယ်စပ်ဂိတ်၌ မြန်မာနိုင်ငံရဲတပ်ဖွဲ့မှ တာဝန်ရှိသူများက တရုတ်ပြည်သူ့သမ္မတနိုင်ငံ၊ ယူနန် ပြည်နယ် ရဲတပ်ဖွဲ့သို့ လွှဲပြောင်းပေးအပ်ခဲ့ကြောင်း သိရှိရပြီး Ming Xuechang(မြီ‌ရှောက်ချန်း) ၏ ရုပ်အ လောင်းကို တရုတ်နိုင်ငံဘက်သို့ ယူဆောင်သွား ခြင်းမရှိဘဲ လိုအပ်သည်များ စစ်ဆေးအတည်ပြုမှုများ ဆောင်ရွက်ခဲ့ကြောင်း သိရသည်။

နစက အနေဖြင့် နိုင်ငံတစ်ဝှမ်း Online လိမ်လည်မှုများ၊ လူကို သွေးဆောင်ဖျားယောင်းမှုများ၊ လူပြန်ပေးမှုများ၊ တရားမဝင်ချုပ်နှောင်မှုများ၊ ခြောက်လှန့်တောင်းယူမှုများကို ဂိုဏ်းဖွဲ့ကျူးလွန်ခြင်း၊ ကျူးလွန်ရန်အားထုတ်ခြင်း၊ အားပေး ကူညီခြင်းများကို ကျူးလွန်ခြင်းများ ပပျောက်စေရေး၊ ပါဝင်ပတ်သက်မှုများ မရှိစေရေး တို့အတွက် သက်ဆိုင်ရာတရားဥပဒေစိုးမိုးရေးအဖွဲ့များက စိစစ်ဖော်ထုတ် အရေးယူ ဆောင်ရွက်မှုများ ပြုလုပ်လျက် ရှိသည့်အပြင် သက်ဆိုင်ရာ အိမ်နီးချင်း နိုင်ငံများနှင့်လည်း စဉ်ဆက်မပြတ် ပူးပေါင်းဆောင်ရွက် လျက်ရှိ ကြောင်း သိရသည်။

“တရုတ်နိုင်ငံဘက်မှာနယ်မြေကျယ်ပြန့်တယ်။ကိုယ်ပိုင်အုပ်ချုပ်ခွင့်ရဒေသတွေရှိ တယ်။ပြည်နယ်အစိုးရရှိတယ်။ ဗဟိုအစိုးရရှိတယ်။ဗဟိုအစိုးရအနေနဲ့အားလုံးအလုံးစုံကိုသိချင်မှ သိနိုင်ပါလိမ့် မယ်။အခုဖြစ်နေတာက မြန်မာ နိုင်ငံနဲ့ကပ်နေတဲ့ဟာဆိုကြည့်လိုက်ရင် လီဆူး ကိုယ်ပိုင်အုပ်ချုပ် ခွင့်ရဒေသတို့ဂျိန်းဖောကိုယ် ပိုင်အုပ်ချုပ်ခွင့်ရဒေသတို့ပြီးရင်ဒီ ၀ တို့၊ကိုးကန့်တို့ရဲ့ကိုယ်ပိုင်အုပ်ချုပ်ခွင့်ရ မဟုတ်ပေမဲ့ သူခရိုင်အဆင့်ပေးထားတဲ့ ဟာလေးတွေပေါ့။ပြီးရင် စစ်ဆောင်ပနားတိုင်း(ကိုယ်ပိုင်အုပ်ချုပ်ခွင့်ရဒေသ)ရှိတယ်။ဒီကိုယ်ပိုင်အုပ်ချုပ်ခွင့်ရဒေသအစိုးရတွေအနေနဲ့ ပတ်သက်ကောင်းပတ်သက်နိုင်လိမ့်မယ်။သူကနီးစပ်တာကိုး၊အွန်လိုင်းကိစ္စနဲ့ပတ်သက်ပြီး တရုတ် ကမြန်မာကိုလိမ်တာ မဟုတ်သလိုမြန်မာ ကလည်းတရုတ်ကိုလိမ်တာမဟုတ်ဘူး။

အဓိကက ဒီမှာရောက်ရှိနေ တဲ့သူတွေအားလုံးကိုကြည့်လိုက်ရင် တရုတ်ကပြည်ပြေးတွေချည်းပဲ။တရုတ်ကပြည်ပြေးတွေ နဲ့ ပြည်ပြေးတွေရဲ့ရင်းနှီးမြှုပ်နှံမှုတွေ က အွန်လိုင်းလိမ်လည်မှုကိုလုပ်သွားတာဖြစ်တယ်။ ကျွန်တော် တို့တံခါးပေါက် ရှမ်း ပြည်နယ်မြန်မာ နိုင်ငံ ရဲ့တိုင်းရင်းသား လူမျိုးစုအများစုနေတဲ့နေရာဖြစ်တယ်။ရှမ်းပြည်နယ်နဲ့ ဆက်စပ်နေတဲ့ ယူနန် ပြည်နယ် တရုတ်နိုင်ငံရဲ့တိုင်းရင်းသားလူမျိုးစုအများဆုံးဖြစ်တယ်။ဒီအပေါ်မှာအခွင့်ကောင်းယူပြီး ထိလွယ်၊ရှလွယ်ဖြစ်တဲ့တိုင်းရင်းသားလူမျိုးတွေကိစ္စတွေကို ဆောင်ရွက်နေတာပဲဖြစ်တယ်။ဒါတွေကိုနှစ် ဖက်ပြည်သူတွေကသတိထားဖို့သိရှိဖို့လိုမှာ ဖြစ်ပါတယ်”ဟု ဗိုလ်ချုပ်ဇော်မင်းထွန်းက ပြောသည်။

MNDAA.TNLA နှင့် AAမြောက်ပိုင်းသုံးဖွဲ့က အောက်တိုဘာလ ၂၇ ရက်တွင် စတင်ခဲ့သည့် တိုက်ပွဲများနှင့်ပတ် သက်၍ သက်ဆိုင်ရာ ဘက်အသီးသီအနေဖြင့် အမြန်ဆုံး အပစ်အခတ်ရပ်စဲပြီး တရုတ်-မြန်မာနယ်စပ် လုံခြုံ ရေးနှင့် တည်ငြိမ်ရေးကို အာမခံချက်ပေးရန် တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Mao Ning က ယင်းနေ့ ပြုလုပ်သည့် သတင်းစာရှင်းလင်းပွဲတွင် ပြောကြားသွားသည်။

Mao Ning က တရုတ်နိုင်ငံအနေဖြင့် သက်ဆိုင်ရာပဋိပက္ခအခြေအနေကို များစွာဂရုပြုနေကြောင်း၊ သက်ဆိုင် ရာ ဘက်သီးသီးမှ အမြန်ဆုံး အပစ်အခတ်ရပ်စဲပြီး ဆွေးနွေးညှိနှိုင်းကာ ငြိမ်းချမ်းသောနည်းလမ်းဖြင့် အငြင်း ပွားမှုကို ဖြေရှင်းရန်၊ အခြေအနေ ပိုမိုဆိုးရွားလာမှုကို ရှောင်ရှားရန်၊ လက်တွေ့ထိရောက်သော ဆောင်ရွက် ချက်များဖြင့် တရုတ်-မြန်မာ နယ်စပ် လုံခြုံရေးနဲ့ တည်ငြိမ်ရေးကို အာမခံချက်ပေးရန် တိုက်တွန်းကြောင်း ယင်းသတင်းစာရှင်းလင်းပွဲအတွင်း သတင်းထောက်များမေးမြန်းမှုအပေါ် ပြန်လည်ပြောကြားခဲ့သည်။

လက်ရှိတွင် မြန်မာနိုင်ငံမြောက်ပိုင်းတွင်ဖြစ်ပွားနေသည့် တိုက်ပွဲများကြောင့် နယ်စပ်ဖြတ် ကျော်လာသောစစ် ဘေး ရှောင်များအား ပြန်လည်နေရာချထားပေးရာတွင် အကူအညီ ပေးထားကြောင်း နိုဝင်ဘာလ ၁၆ ရက်က ပြုလုပ်သည့် ပုံမှန်ပြုလုပ်နေကျ သတင်းစာရှင်းလင်း ပွဲတွင် တရုတ်နိုင်ငံခြားရေးဝန်ကြီးဌာန ပြော ရေးဆိုခွင့်ရှိသူ Mao Ning က ထပ်မံ ပြောကြားခဲ့သည်။

“မြန်မာဘက်ကနေ တရုတ်ဘက်ကို စစ်ပွဲရှောင်ဖို့ ဝင်လာ သူတွေကို လူသားချင်းစာနာမှု၊ မြန်မာနိုင်ငံနဲ့ ရင်းနှီးတဲ့ ခင်မင်မှု တွေကြောင့် တရုတ်ဘက်က ကောင်းကောင်းမွန် မွန် ပြန်လည်နေရာချထားပေးထား ပါတယ်၊ နာမကျန်းသူတွေနဲ့ ဒဏ်ရာရထားသူတွေကိုလည်း ကုသပေးဖို့ ကြိုးပမ်း ဆောင်ရွက်ထားတယ်၊ ရွှေ့ပြောင်းလာသူတွေရဲ့ နေအိမ်တွေကို အမြန်ဆုံးပြန်နိုင်ဖို့၊ ပုံမှန်ဘဝ ပြန်လုပ်ဖို့ တိုက်ပွဲတွေ မြန်မြန်ရပ်ဖို့ တိုက်ခိုက်နေတဲ့ အဖွဲ့တွေကို တရုတ်အစိုးရက တိုက်တွန်းပါ တယ်” ဟု သူက ပြောသည်။

ကိုးကန့်ကိုယ်ပိုင်အုပ်ချုပ်ခွင့်ရဒေသ၏ မြို့တစ်မြို့ ဖြစ်သော လောက်ကိုင်တွင် MNDAA အဖွဲ့အနေဖြင့် ဩဇာ အာဏာပြန်လည်တည်ဆောက်ရန်အတွက် တိုက်ခိုက်မှု များကို လုပ်ဆောင်ရန်၂၀၂၂ ခုနှစ် မှစတင်၍ ကြို တင်ပြင်ဆင်မှုများဆောင်ရွက် ခဲ့သည်ဟုသိရကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားခဲ့သည်။
#Yangon_Times/PP
#Local_News
#Published_ 17 November 2023
#YMG #Yangon_Times #Yangon_Media_Group