
၂၇ စက်တင်ဘာ ၂၀၂၃
မကြာတော့သည့် ကာလတစ်ခု၌ မြန်မာ့ခရီးသွားလုပ်ငန်းသည် ကိုဗစ်-၁၉ မတိုင်မီကာလအခြေအနေကို ပြန်လည်ရောက်ရှိနိုင်မည်ဟုယုံကြည်တယ်လို့ နစက ဥက္ကဋ္ဌ၊နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ပြောကြားပါတယ်။
စက်တင်ဘာ ၂၇ရက်က နေပြည်တော်ရှိ မြန်မာအပြည်ပြည် ဆိုင်ရာကွန်ဗင်းရှင်း (ဗဟိုဌာန-၂)၌ ကျင်းပပြုလုပ်တဲ့ ၂၀၂၃ ခုနှစ်၊ ကမ္ဘာ့ခရီးသွား လုပ်ငန်းနေ့ အထိမ်းအမှတ်အခမ်းအနားတွင် နစက ဥက္ကဋ္ဌက ယခုလိုထည့်သွင်းပြောကြားခဲ့တာဖြစ်တယ်လို့ နစက သတင်းထုတ်ပြန်ရေးအဖွဲ့က သတင်းထုတ်ပြန်ပါတယ်။
ဟိုတယ်နှင့်ခရီးသွားလာရေး ဝန်ကြီးဌာနက ပြည်တွင်း၊ ပြည်ပ ခရီးသွားများ တိုးတက်လာစေရန် မဟာဗျူဟာ လုပ်ငန်းစီမံချက်များ ရေးဆွဲ ဆောင်ရွက်ထားတဲ့အတွက် ယခုနှစ်တွင် မြန်မာနိုင်ငံကို ခရီးသည်ရောက်ရှိမှု ပိုမိုတိုး တက်များပြား လာမည်ဖြစ်တယ်လို့ ဗိုလ်ချုပ်မှူးကြီးက ပြောပါတယ်။
မြန်မာနိုင်ငံသို့ နိုင်ငံတကာခရီးသွာများဝင်ရောက်မှုသည် ယခင်နှစ်နှင့် ကာလတူနှိုင်းယှဉ်ကြည့်တဲ့အခါ ၆ ဆခန့် တိုးတက် လာခဲ့တယ်လို့ ဗိုလ်ချူပ်မှူးကြီးက ဆက်လက်ပြောကြားပါတယ်။
၂၀၂၃ ခုနှစ် ဇန်နဝါရီလမှ ဇူလိုင်လ အထိ နိုင်ငံတကာခရီးသွားဧည့်သည် ခြောက်သိန်းကျော် ဝင်ရောက်ခဲ့တာဖြစ်ပြီး ယခင်နှစ်က အလားတူကာလအပိုင်းအခြားမှာ ခရီးသွား တစ်သိန်းကျော်သာ ဝင်ရောက်ခဲ့တာ ဖြစ်ပါတယ်။
ရေရှည်တည်တံ့ပြီး ဖွံ့ဖြိုးတိုးတက်စေသည့် ခရီးသွားလုပ်ငန်းဖော်ဆောင်နိုင်ရန် ခရီးသွားလုပ်ငန်းဆိုင်ရာ အခြေခံအဆောက်အဦများကို တည်ဆောက်ရာ၌ သဘာဝ သယံဇာတများကို အကျိုးရှိစွာအသုံးပြုပြီး စွမ်းအင်ချွေတာရေး နည်းလမ်းများနှင့် ဆောင်ရွက်သည့် အစိမ်းရောင်အဆောက်အဦများ ဖွံ့ဖြိုးရေးလုပ်ငန်းများတွင် ရင်းနှီး မြှုပ်နှံကြပါလို့လည်း ဗိုလ်ချုပ်မှူးကြီးက လုပ်ငန်းရှင်တွေကိုတိုက်တွန်းခဲ့တယ်လို့သတင်းထုတ်ပြန်ချက်မှာ ဖော်ပြထားပါတယ်။
မြန်မာနိုင်ငံတွင်သဘာဝတရားကြီးကပေးထားသည့် အကြီးမားဆုံး လက်ဆောင် ဖြစ်အဖြစ် အလားတူ အဖိုးမဖြတ်နိုင်သည့် ယဉ်ကျေးမှုအမွေအနှစ် များစွာရှိတဲ့အတွက် အဆိုပါသဘာဝအရင်းအမြစ် ယဉ်ကျေးမှု အမွေအနှစ်များကို အခြေခံပြီး ခရီးစဉ်ဒေသ နှင့်ခရီးသွား ဆွဲဆောင်မှုများအဖြစ် ဖော်ထုတ်ဖို့လည်း ဗိုလ်ချုပ်မှူးကြီးက အကြံပြုပြောဆိုခဲ့ပါတယ်။
တည်ငြိမ်အေးချမ်းမှုရှိခြင်းသည် ခရီးသွားကဏ္ဍ ဖွံ့ဖြိုးတိုးတက်ရေးကို အထောက်အကူပြုစေသောကြောင့် ဘက်ပေါင်းစုံ၊ ကဏ္ဍပေါင်းစုံ တည်ငြိမ်အေးချမ်းရေးကို ဆောင်ရွက်သွား ကြရလိမ့်မယ်လို့လည်း ဗိုလ်ချုပ်မှူးကြီးက ဆက်လက်ပြောဆိုပါတယ်။
မြန်မာနိုင်ငံအနေဖြင့် ၂၀၂၂ ခုနှစ်၊ ဧပြီ ၁၇ ရက်မှစတင်ကာ နိုင်ငံတကာ လေကြောင်းလိုင်းများ ပြန်လည်စတင်ပြေးဆွဲခွင့်ပြုခဲ့ပြီး ကမ္ဘာလှည့် e-visa ကို မေလ ၂၀ ရက်က စတင်ခွင့်ပြုပေးခဲ့ပါတယ်။ ၂၀၂၂ ခုနှစ်တွင် ပြည်ပနိုင်ငံအသီးသီးမှ လေဆိပ်၊ ရေဆိပ်နှင့် နယ်စပ်စသည့် နိုင်ငံတကာဝင်ပေါက်အသီးသီးမှ နိုင်ငံတကာ ခရီးသွား စုစုပေါင်း ၂ သိန်းကျော် ဝင်ရောက်ခဲ့ပြီး ၂၀၂၁ ခုနှစ်ကထက် ၄၃ ရာခိုင်နှုန်းကျော် တိုးတက်ခဲ့ပါတယ် ။၂၀၂၃ ခုနှစ် ဇန်နဝါရီလမှ ဇူလိုင်လ အထိ နိုင်ငံတကာခရီးသွားဧည့်သည် ခြောက်သိန်းကျော် ဝင်ရောက်ခဲ့ကြောင်း သိရှိရပါတယ်။
အဲဒီနောက် ဗိုလ်ချူပ်မှူးကြီးမင်းအောင်လှိုင်၊ ကောင်စီတွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦးနှင့် ကောင်စီဝင်ဗိုလ်ချုပ်ကြီးတင်အောင်စန်းတို့က ကမ္ဘာ့ခရီးသွားလုပ်ငန်း နေ့အထိမ်းအမှတ် ပြိုင်ပွဲများမှ ဆုရရှိသူတွေကို ဆုချီးမြှင့်ခဲ့ပြီးနောက် အထိမ်းအမှတ်ပြပွဲတွင် ခင်းကျင်းပြသထားတာတွေကိုကြည့်ရှုအားပေး ခဲ့ကြကြောင်းသတင်း ထုတ်ပြန်ချက်မှာဖော်ပြထားပါတယ်။
-knl/ymg
- Category: Myanmar

၁၇ စက်တင်ဘလာ ၂၀၂၃
Googleကို ပူးတွဲတည်ထောင်တဲ့ ဆာဂေးဘရင်ဟာ သူ့ဇနီး နီကိုးလ်ရှန်နာဟန်နှင့်တိတ်တိတ်ကလေးကွာရှင်းလိုက်ပါတယ်။ ဘာဖြစ်လို့လဲ ဆိုတော့ ရှေ့နေနှင့် လုပ်ငန်းရှင်တစ်ဦးဖြစ်တဲ့ သူ့ဇနီးနီးကိုလ်ရှန်နာဟန်ဟာ ဘီလျံနာသူဋ္ဌေး အီလွန်မတ်စ်နှင့် ဇာတ်လမ်းရှုပ်ခဲ့တာကြောင့်ဖြစ်တယ်လို့ Business Insider ကသတင်းရေးသားပါတယ်။
တရားရုံးစာရွက်စာတမ်းများအရ သူတို့လင်မယားဟာ မေ ၂၆ရက်နေ့မှာ ကွာရှင်းပြတ်စဲခဲ့ကြတယ်လို့ အတည်ပြုထားပါတယ်။ အခု သူတို့ဟာ တရားဝင် ကွဲသွားကြတာဖြစ်ပြီး သူတို့ရဲ့ လေးနှစ်သမီး ထိန်းသိမ်းစောင့်ရှောက်ရေး ဆက်လက်ရင်ဆိုင်ကြမှာဖြစ်ပါတယ်။
သူတို့ဇနီးမောင်နှံနှစ်ဦးဟာ ၂၀၁၅ခုနှစ်မှာ စပြိးတွဲခဲ့ကြတာဖြစ်ပါတယ်။ အဲဒီနှစ်မှာပဲ မစ္စတာဘရင်ဟာ သူ့ပထမဇနီး အန်းဝိုစစ်စကီနှင့် ကွာရှင်းခဲ့တာပါ။ အဲဒီနောက်သူတို့ဟာ ၂၀၁၈ခုနှစ်မှာ လက်ထပ်ခဲ့ကြတယ်လို့ သတင်းမှာဆက်လက်ရေးသားထားပါတယ်။
ဒါပေမယ့် သူတို့ဟာ ၂၀၂၁ ခုနှစ်မှာ ခွဲနေကြပြီးနောက် ၂၀၂၂ခုနှစ်မှာ မစ္စတာဘရင်က ကွာရှင်းဖို့ တရားရုံးမှာ လျှောက်ထားခဲ့ပါတယ်။ ညှိနှိုင်းပေါင်းစပ်လို့မရနိုင်တဲ့ ကွာဟမှုတွေကြောင့်လို့ သူက အကြောင်းပြပါတယ်။
သူ့ဇနီးဟာ အီလွန်မတ်စ်နှင့် ဇာတ်လမ်းရှုပ်တာကို သူသိရှိပြီးနောက် တစ်လအကြာမှာ သူက ကွာရှင်းခွင့်တင်ခဲ့တာဖြစ်တယ်လို့ နယူးယောက်ပို့စ်သတင်းစာကရေးသားပါတယ်။ အီလွန်မတ်စ်နှင့် ဘရင်တို့ဟာ နှစ်ပေါင်းများစွာကတည်းက ခင်မင်လာခဲ့ကြတဲ့ သူငယ်ချင်းတွေဖြစ်ကြပါတယ်။ ဒါပေမယ့် သူစွပ်စွဲတာမဟုတ်ဘူးလို့တော့ အီလွန်မတ်စ်နှင့် ရှန်နာဟန်တို့နှစ်ဦးစလုံးက ငြင်းဆိုထားကြပါတယ်။
“ဆာဂေးနှင့် ကျွန်တော်တို့ သူငယ်ချင်းတွေပါ။ မနေ့ညကတောင်ပါတီမှာ အတူရှိခဲ့ကြပါသေးတယ်။ ကျွန်တော်နှင့် နီးကိုလ်တို့ သုံးနှစ် အတွင်း နှစ်ကြိမ်ပဲဆုံဖူးတယ်။ အဲဒီအခါတိုင်းမှာ အခြားလူတွေအနားမှာရှိနေတာချည်းပဲ။ ဘာဇာတ်လမ်းမှမရှိဘူး” လို့ အီလွန်မတ်စ်က သူ့ရဲ့ အိတ်စ် ပလက်ဖောင်းပေါ်ကနေ ၂၀၂၂ခုနှစ် ဇူလိုင် ၂၅ရက်တုန်းက ရှင်းလင်းခဲ့ပါတယ်။ အဲဒီတုန်းက ဝေါစထရိဂျာနယ်သတင်းစာရဲ့ ဆောင်းပါး “ အီလွန်မတ်ရဲ့ ဆာဂေးဘရင်နှင့် မိတ်ဆွေဖြစ်မှု ဇာတ်လမ်းရှုပ်မှုကြောင့် အကွဲအပြဲဖြစ်”ကို သူကပြန်တုန့်ပြန်ခဲ့တာပါ။
ယခုလောလောဆယ်လည်း ရှန်နာဟန်က ဒါမဟုတ်တမ်းတရားတွေလို့ပြောလိုက်ပြီး သူမအနေနှင့် မတ်စ်နှင့် မိတ်ဆွေအဖြစ်ထက် ဘယ်တုန်းကမှ မပိုခဲ့ဘူးလို့ ပြောပါတယ်။
“ကျွန်မနှင့် အီလွန်နှင့် ရမက်ပြင်းပြစွာ အတူအိပ်ခဲ့ကြတဲ့တခဏာတာ ဒါနှင့်ပြီးသွားတာလား ၊ဟင့်အင်းပါ။ ကျွန်မတို့ မေတ္တာဇာတ်လမ်း တွေခင်းခဲ့ကြတာလား။ ဟင်းအင်းပဲ။ ကျွန်မတို့ဘာဇာတ်လမ်းမှမရှုပ်ခဲ့ကြဘူး” လို့ သူမကလည်း ဇူလိုင်လတုန်းက ပြောခဲ့ပါတယ်။ ဝေါစထရိဂျာနယ်ကတော့ သူတို့ရဲ့ သတင်းအရင်းအမြစ်ဟာစိတ်ချရတယ်။ သူတို့သတင်းအပေါ်သူတို့ရပ်တည်ထားတယ်လို့ ပြောပါတယ်။
အသက် ၅၀အရွယ်ရှိပြီဖြစ်တဲ့ Google ပူးတွဲတည်ထောင်သူ ဆာဂေးဘရင်းဟာ ကမ္ဘာပေါ်မှာ (၉)ဦးမြောက် အချမ်းသာဆုံးသူဖြစ်ပါတယ်။
ဒေါ်လာ ၁၁၈ ဘီလျံချမ်းသာပါတယ်လို့ ဘလွန်းဘတ်အညွှန်းကိန်းအရသိရပါတယ်။ မစ် ရှန်နာဟန်ဟာ အသက် ၃၄နှစ်ရှိပြီး ကာလီဖိုနီးယား အခြေစိုက် ရှေ့နေတစ်ဦးနှင့် ဘိုင်ယာ-အက်ကိုးဖောင်ဒေးရှင်းတည်ထောင်သူနှင့် ဥက္ကဋ္ဌဖြစ်ပါတယ်။
Source : BusinessInsider/NYPost
- Category: World

၁၆ စက်တင်ဘာ ၂၀၂၃
မြန်မာအမျိုးသားလေကြောင်းလိုင်း (MNA) သည် ဒေသတွင်းနိုင်ငံ များသို့ Cargo လေယာဉ်ခရီးစဉ် စတင်ပျံသန်းမည်ဖြစ်ကြောင်း သိရှိရသည့်အတွက် လေကြောင်းကုန်စည်ပို့ဆောင်မှုကဏ္ဍတွင် MNA အနေဖြင့် ပါဝင်ဆောင်ရွက်နိုင်တော့မှာဖြစ်တယ်လို့ ဗိုလ်ချူပ်မှူးကြီးမင်းအောင်လှိုင်ကပြောပါတယ်။
စက်တင်ဘာ ၁၆ ရက် မနက်ပိုင်းက ရန်ကုန်မြို့၊ ဗဟန်းမြို့နယ်ရှိ Melia Hotel ၌ ကျင်းပပြုလုပ်ခဲ့တဲ့ ပို့ဆောင်ရေးနှင့်ဆက်သွယ်ရေးဝန်ကြီး ဌာန၊ မြန်မာအမျိုးသားလေကြောင်း (Myanmar National Airlines - MNA)ရဲ့ (၇၅) နှစ်မြောက် စိန်ရတုနှစ်ပတ်လည်နေ့ အခမ်းအနားတွင် နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် ဂုဏ်ပြုအမှာစကားပြောကြားခဲ့ရာတွင် ယခုလိုပြောကြားခဲ့တာဖြစ်တယ်လို့ နစကရဲ့သတင်းထုတ်ပြန်ချက်အရသိရပါတယ်။
ခရီးစဉ်များ ပျံသန်းပြေးဆွဲရာမှာ အချိန်မှန်ကန်ရေးကိုလည်း အလေးထား ဆောင်ရွက်သွားကြရေးနှင့် ဘေးအန္တရာယ်ကင်းရှင်းပြီး လုံခြုံစိတ်ချစွာ သွားလာနိုင်ရေးအတွက် လေကြောင်းပို့ဆောင်ရေးညွှန်ကြားမှု ဦးစီးဌာနက ထုတ်ပြန်ထားသည့် Rules and Regulation များ၊ SOP များကိုလည်း တိကျစွာ လိုက်နာကြရန်လည်း ဗိုလ်ချုပ်မှူးကြီးက ပြောတဲ့အကြောင်း သတင်းထုတ်ပြန် ချက်မှာဖော်ပြထားပါတယ်။
မြန်မာအမျိုးသား လေကြောင်းအနေဖြင့်“ကမ္ဘာကြည့် ကြည့် မြင်” ဆောင်ရွက်သွားဖို့လည်း ဗိုလ်ချုပ်မှူးကြီးကပြောပါတယ်။ ကိုဗစ်-၁၉ အလွန်ကာလ လေကြောင်းခရီးသွားစီးပွားရေးကဏ္ဍ ပြန်လည် ဖွံ့ဖြိုး တိုးတက်လာသည့် အချိန်ကာလကိုရောက်ရှိလာပြီဖြစ်သဖြင့် မြန်မာ အမျိုးသား လေကြောင်းအနေဖြင့် ဈေးကွက်သုတေသနကို အလေးထား ပြုလုပ်ကြဖို့လည်း နစက ဥက္ကဋ္ဌက တိုက်တွန်းခဲ့ပါတယ်။
မြန်မာ့လွတ်လပ်ရေးရပြီးနောက် ပေါ်ပေါက်လာသည့် UBA နှင့် BAC သည် ပြည်တွင်းလေကြောင်းခရီးစဉ်များကို သာမက ဒေသတွင်းပြည်ပနိုင်ငံများနှင့် ခရီးစဉ်များကိုပါ ပြေးဆွဲခဲ့ပြီး သမိုင်းတစ်ခေတ် တွင် အောင်မြင်မှုမှတ်တိုင်များ စိုက်ထူနိုင်ခဲ့တဲ့အတွက် ပြည်သူလူထု၏ရင်ထဲတွင် ရှိနေခဲ့ခြင်းဖြစ်ပြီး ဂုဏ်ယူဖွယ်ရာလည်းဖြစ်တယ်လို့ ဗိုလ်ချုပ်မှူးကြီးက ဂုဏ်ပြုပြောကြားပါတယ်။
ယင်းနောက် ဒုတိယဝန်ကြီးချုပ်နှင့် ပို့ဆောင်ရေးနှင့် ဆက်သွယ်ရေး ဝန်ကြီးဌာန ပြည်ထောင်စုဝန်ကြီး ဗိုလ်ချုပ်ကြီး မြထွန်းဦး နှင့် မြန်မာအမျိုးသားလေကြောင်း၊ စီမံခန့်ခွဲရေးအဖွဲ့ဥက္ကဋ္ဌ ဦးဇင်ယော်က မြန်မာအမျိုးသားလေကြောင်းလိုင်းနှင့်ပတ်သက်၍ ရှင်းလင်းတင်ပြခဲ့ကြပါတယ်။
မြန်မာအမျိုးသားလေကြောင်းကို မြန်မာနိုင်ငံလွတ်လပ်ရေးနှင့်အတူ ၁၉၄၈ ခုနှစ်၊ စက်တင်ဘာလ(၁၅)ရက်တွင် “ပြည်ထောင်စု မြန်မာနိုင်ငံ လေကြောင်း သယ်ယူပို့ဆောင်ရေးအဖွဲ့” (Union of Burma Airways - UBA) အမည်ဖြင့် စတင် တည်ထောင်ခဲ့ တာဖြစ်ပါတယ်။၁၉၇၂ ခုနှစ်တွင် “လေကြောင်းပို့ဆောင်ရေး ကော်ပို ရေးရှင်း” (Burma Airways Corporation-BAC)၊ ၁၉၈၉ ခုနှစ်တွင် “မြန်မာ့လေကြောင်း”(Myanma Airways-MA)၊ ၂၀၁၅ ခုနှစ်တွင် “မြန်မာအမျိုးသားလေကြောင်း” (Myanmar National Airlines - MNA)အဖြစ် အဆင့်ဆင့် ပြောင်းလဲဖွဲ့စည်းခဲ့တာဖြစ်တယ်လို့သိရှိရပါတယ်။
-ymg/knl
- Category: Myanmar

၁၄ စက်တင်ဘာ ၂၀၂၃
ဓာတ်ရောင်ခြည် စိုးရိမ်မှုများ ကြောင့် ပြင်သစ် နိုင်ငံက အိုင်ဖုန်း ၁၂ ရောင်းချ မှု ကို တားမြစ် ခြင်း သည် ဥရောပ တစ်လွှား သက်ရောက် မှု များ ရှိ နိုင် သည် ဟု ၊ ဘယ်လ်ဂျီယံ ၊ ဂျာမနီ နှင့် နယ်သာလန် ရှိ အာဏာပိုင်များက သတိပေးခဲ့ပါတယ်။
အက်ပဲလ်၏ ပြန်လည်ပြုပြင်ပေးမှုများ အလုပ်မဖြစ်လျှင် ပြင်သစ် နိုင်ငံ ရှိ အိုင်ဖုန်း ၁၂ ဖုန်း အားလုံး ကို ပြန်လည်သိမ်းဆည်းပေးရမည်ဟု ၊ ပြင်သစ်နိုင်ငံ ၏ အမျိုးသား ဆက်သွယ်ရေးလှိုင်းအေဂျင်စီ ( ANFR) က အင်္ဂါ နေ့ တွင်ပြောကြားပါတယ်။ အိုင်ဖုန်း ၁၂၏ လျှပ်စစ်သံလိုက်လှိုင်း ဓာတ်ရောင်ခြည်က ၄၀ရာခိုင်နှုန်းရှိနေကြောင်း တွေ့ရှိရပြီး ယင်းက တရားဝင်ကန့်သတ်သတ်မှတ်ချက်ထက် ကျော်လွန်နေတာဖြစ်ပါတယ်။
ဒတ်ခ်ျ ဒစ်ဂျစ်တယ် စောင့် ကြည့် ရေး အဖွဲ့ က ယင်း သည် ANFR အစီရင်ခံ စာ ကို ကြည့်ရှု ခဲ့ပြီး အမေရိကန် နည်းပညာ ကုမ္ပဏီထမှ ရှင်းပြချက် တစ် ခုကို စောင့်နေသည်ဟု ဗုဒ္ဓဟူးနေ့က ပြောခဲ့ပါတယ်။
"စံနှုန်းကို ကျော်လွန်သွားပြီ။ ကံကောင်းတာက ကြီးမားတဲ့ လုံခြုံ ရေး အန္တရာယ် မရှိပေမယ့် ကျွန်တော် တို့ အနေနှင့် ထုတ်လုပ်သူ နှင့် မကြာမီ ဆွေးနွေး မှု တစ်ခုလုပ်ပါမယ်" လို့ နယ်သာလန် ဒစ်ဂျစ်တယ်အခြေခံအဆောက်အအုံစစ်ဆေးရေးအဖွဲ့ (အာရ်ဒီအိုင်)က ဒတ်ချ် သတင်းစာ အယ်လ်ဂီမင်းဒက်ဘလက်ကို ပြောပါတယ်။
"နယ်သာလန်နိုင်ငံဟာ ပြင်သစ်လိုပဲ မိုဘိုင်းလ်ဖုန်းတွေကို ဘေးကင်းစွာ အသုံးပြုဖို့ အရေးကြီးတယ်။ မိုဘိုင်းလ်ဖုန်းတွေက ဥရောပစံနှုန်းတွေကို လိုက်နာရမယ်”
ဘယ်လ်ဂျီယံ နှင့် ဂျာမနီ တို့ သည် ကြာသပတေးနေ့တွင် သူတို့ရဲ့ ကိုယ်ပိုင် ထုတ်ပြန်ချက်များကို လိုက်ပါထုတ်ပြန်ခဲ့ပြီး ၊ ပြင်သစ် လုပ်ထုံးလုပ်နည်း သည် ဥရောပ တစ် ခု လုံး အတွက် လမ်းညွှန်ချက်တစ်ခုဖြစ်နိုင်တယ်ဟု ကွန်ယက်အာဏာပိုင်များက ပြောကြားခဲ့ပါတယ်။
ပြင်သစ်နိုင်ငံဒစ်ဂျစ်တယ် စီးပွားရေး အငယ်တန်း ဝန်ကြီး ၊ ဂျင်း-နိုရယ် ဘာရော့ က ANFR ၏ အချက်အလက် များ ကို အခြား အီးယူ အဖွဲ့ဝင်နိုင်ငံ များကို ဝေမျှပေးမယ်လို့ပြောကြားပါတယ်။အဲသလိုသာဆိုရင် အက်ပဲလ်အတွက် အခြေအနေတွေပိုကြီးထွားလာစေဖို့ ဦးတည်သွားနိုင်ပါတယ်။
" အက်ပဲလ်အနေနှင့် နှစ်ပတ်အတွင်း တုံ့ပြန်လိမ့်မယ်လို့မျှော်လင့်ပါတယ်” လို့ သူက ပြင်သစ်သတင်းစာ လီ ပါရီဆန်ကို ပြောခဲ့ပါတယ်။
"သူတို့က တုန့်ပြန်ဖို့ပျက်ကွက်ခဲ့ရင် အိုင်ဖုန်း ၁၂ အားလုံးကို ပြန်သိမ်းဆည်းဖို့အတွက် အမိန့်ထုတ်ဖို့ ကျွန်တော်ပြင်ဆင်ထားပါတယ်။ ဒီဂျစ်တယ်ဘီလူးကြီးတွေအပါအဝင် အားလုံးအတွက် စည်းမျဉ်းက အတူတူပါပဲ” လို့သူကပြောပါတယ်။
အင်္ဂါ နေ့ တွင် အိုင်ဖုန်း ၁၅ စတင်ရောင်းချ ပြီးနောက် အိုင်ဖုန်း ၁၂ စမတ်ဖုန်းအတွဲများကို ရပ်ဆိုင်း ရန် စီစဉ်ထားပြီးဖြစ်ပါတယ်။ အဲဒီအတွက် အိုင်ဖုန်းအရောင်းအပေါ် သိသိသာသာ သက်ရောက်မှုမရှိတဲ့သဘောပါ။
သို့သော် အဖြေရှာမရ၍ ဥရောပတိုက်အနှံ့ ဖုန်းများကို ပြန်သိမ်းဆည်းပါက ယင်းသည် ကမ္ဘာ့အချမ်းသာဆုံးကုမ္ပဏီအတွက် သိသာတဲ့ အကျိုးသက်ရောက်မှုဖြစ်စေပါလိမ့်မယ်။
Source Independent
- Category: World

၁၁ စက်တင်ဘာ ၂၀၂၃
မြန်မာနိုင်ငံက ရုရှားရင်းနှီးမြှပ်နှံမည့်သူတွေကို စိုက်ပျိုးရေးလုပ်ငန်းတွေမှာ လာရောက်ရင်းနှီးမြှပ်နှံကြဖို့ ဖိတ်ခေါ်လိုက်ပြီး ကုန်သွယ်ရေး လမ်းကြောင်းအသစ်တွေကို ဖန်တီးဖို့ ထောက်ပို့နှင့်သယ်ယူပို့ဆောင်ရေးစင်္ကြံတွေ တည်ဆောက်ဖို့ အဆင်သင့်ဖြစ်နေပြီလို့ မြန်မာ ဒုတိယ ဝန်ကြီးချုပ်နှင့် ပို့ဆောင်ရေးနှင့်ဆက်သွယ်ရေးဝန်ကြီး ဗိုလ်ချူပ်ကြီးမြထွန်းဦးက ပြောကြားတယ်လို့ ရုရှား RIA သတင်းက ရေးသားလိုက်ပါတယ်။
“ စိုက်ပျိုးရေးထုတ်ကုန်တွေနှင့် စားသောက်ကုန်တွေကို ကျွန်တော်တို့ ထုတ်လုပ်ပြီး ဥရောပအာရှ Eurasian ဈေးကွက်ကို တင်ပို့နိုင်မယ်လို့ ကျွန်တော်တို့ ယုံကြည်မျှော်လင့်ထားပါတယ်။ ရင်းနှီးမြှပ်နှံသူတွေကို မြန်မာနိုင်ငံလာပြီး ကျွန်တော်တို့ရဲ့လယ်ယာထွက်ကုန်တွေကို လာရောက်အကဲဖြတ်ဖို့ ကျွန်တော်ဖိတ်ခေါ်ပါတယ်” လို့ ရုရှားနိုင်ငံမှာကျင်းပနေတဲ့ (၈)ကြိမ်မြောက် အရှေ့ဒေသစီးပွားရေးဖိုရမ်မှာ ဗိုလ်ချူပ်ကြီး မြထွန်းဦးက ပြောကြားခဲ့တာဖြစ်ပါတယ်။
မြန်မာနှင့်အိန္ဒိယအကြား မြောက်တောင်စင်္ကြံတစ်ခုတည်ဆောက်ခြင်းဖြင့် ဒေသအတွင်း ကုန်သွယ်ရေးတွေ တိုးတက်လာလိမ့်မယ်လို့ လည်း ဗိုလ်ချူပ်ကြီးမြထွန်းဦးကပြောပါတယ်။ အဲဒီကမှတစ်ဆင့် တောင်အာရှ၊ အရှေ့အလယ်ပိုင်းနှင့်ရုရှားတို့အကြား ကုန်သွယ်ရေးလမ်းကြောင်း တွေနှင့် ထောက်ပို့အချိတ်အဆက်တွေပိုအားကောင်းလာလိမ့်မယ်လို့လည်း သူကဆက်လက်ပြောဆိုတဲ့အကြောင်း သတင်းမှာဖော်ပြ ထားပါတယ်။
- Category: Myanmar
၁၁ စက်တင်ဘာ ၂၀၂၃
အမျိးသမီးတစ်ဦး အမေရိကန်နိုင်ငံက Walmart ဆိုင်တစ်ဆိုင်ထဲဝင်ပြီး ဝိုင်ပုလင်းတွေကို စိတ်ဆိုးမာန်ဆိုးနှင့် ရိုက်ခွဲနေတဲ့ ဗွီဒီယို ဆိုရှယ်မီဒီယာတွေမှာ ပျံ့နှံ့နေပါတယ်။
ဘယ်နေရာကဆိုင်မှာ ဘယ်တုန်းကလဲဆိုတာတော့ ဖော်ပြမထားပါဘူး။
ပြီးခဲ့တဲ့နှစ်တွေမှာ ကုန်ဈေးနှုန်းကြီးမြင့်မှုတွေကြောင့် ဝေါလ်မတ်အပါအဝင် အမေရိကန်စတိုးဆိုင်ကြီးတွေမှာ အကြမ်းဖက် ဖျက်ဆီးအလစ်သုတ်မှုတွေတိုးပွားလာတာကို ရင်ဆိုင်နေကြရပါတယ်။ အဲဒါကြောင့် အချို့သော နေရာတွေက ဆိုင်တွေဆိုပိတ်ပစ်လိုက်ရတဲ့ အခြေအနေတွေအထိ ကြုံတွေ့နေကြရပါတယ်။
Source : CJ in media
- Category: World

၁၁ စက်တင်ဘာ ၂၀၂၃
ရုရှားနိုင်ငံမှ ရေနံထုတ်ကုန်များ ဝယ်ယူရာတွင် တရုတ်ယွမ်ငွေဖြင့်ပေးချေနေတယ်လို့ မြန်မာနစက ရင်းနှီးမြှပ်နှံမှုနှင့် နိုင်ငံခြား စီးပွားဆက်သွယ်ရေးဝန်ကြီးဌာန ဝန်ကြီး ဒေါက်တာကံဇော်ကပြောကြားလိုက်တယ်လို့ Sputnik သတင်းအေဂျင်စီက သတင်းရေးသားပါတယ်။
မြန်မာနှင့်ရုရှားတို့ဟာ နိုင်ငံတွေရဲ့ငွေကြေးတွေကို အပြန်အလှန်ပြောင်းလဲခြင်းအတွက်လည်း စီစဉ်နေတယ်လို့ ဒေါက်တာကံဇော်က ဆက်လက်ပြောဆိုပါတယ်။
“ ကျွန်တော်တို့ဟာ လောလောဆယ် ရူဘယ်ကိုမသုံးသေးဘဲ ယွမ်ကိုသုံးနေပါတယ်။ ဒါပေမယ့် ကျွန်တော်တို့ဟာ ကျပ်-ရူဘယ် အပြန်အလှန်ပြောင်းလဲခြင်းသဘောတူညီချက်အတွက် ကြိုးစားဆောင်ရွက်နေကြပါတယ်။ မကြာမီမှာ လက်မှတ်ရေးထိုးဖို့ရှိနေပါတယ်လို့ ရုရှားနိုင်ငံ ဗလက်ဒီဗိုစတော့ခ်မြို့မှာ အရှေ့ဖျားဒေသ စီးပွားရေးဖိုရမ်တက်ရင်းရောက်ရှိနေတဲ့ ဒေါက်တာကံဇော်က Sputnik ကို ပြောပါတယ်။
အဲဒီအပြင် မြန်မာနိုင်ငံဟာ ရုရှားနှင့် ခရီးသွားကဏ္ဍသဘောတူညီချက်လည်း ယခုဖိုရမ်နှင့်ဆက်စပ်ပြီး မကြာမီ အပြီးသတ်လိမ့်မယ်လို့ သူမျှော်လင့်ထားတယ်လို့လည်း ဒေါက်တာကံဇော်ကပြောပါတယ်။
ပြီးခဲ့တဲ့နှစ်စက်တင်ဘာလတုန်းက ဝန်ကြီးချုပ် ဗိုလ်ချူပ်မှူးကြီးမင်းအောင်လှိုင်က ရုရှားထံမှ ရေနံထုတ်ကုန်များကို စတင်ဝယ်ယူနေပြီလို့ Sputnik ကိုပြောခဲ့တယ်လို့ သတင်းမှာဖော်ပြထားပါတယ်။
(၈)ကြိမ်မြောက် အရှေ့ဖျားဒေသစီးပွားရေးဖိုရမ်ကို ရုရှားနိုင်ငံ ဗလက်ဒီဗိုစတော့ခ်မြို့ရဲ့ အရှေ့ဖျားဒေသ ဖက်ဒရယ်တက္ကသိုလ်ဝင်းထဲမှာ စင်တက်ဘာ ၁၀ရက်မှ ၁၃ရက်အထိကျင်းပနေပြီး မြန်မာနိုင်ငံမှ နစကဝန်ကြီးများတက်ရောက်လျက်ရှိနေတာဖြစ်ပါတယ်။
- Category: Myanmar